Consellería de Infraestruturas e Movilidade

CMATI

Vostede está en:
|
|
|
Compartir

OS USUARIOS DO PLAN DE TRANSPORTE METROPOLITANO DE FERROL PODERÁN UTILIZAR A TARXETA AZUL NOS SERVIZOS DE FEVE A PARTIR DO VINDEIRO LUNS

- Temporalmente tamén poderá seguir utilizándose a antiga TMG laranxa co obxectivo de facilitar o cambio aos usuarios
- Coa nova tarxeta afórrase ata o 50% nos desprazamentos e non se paga máis por transbordar
- No caso de realizar máis de 40 viaxes ao mes, o usuario percibirá o 15% do gastado nesa mensualidade a finais do mes seguinte a aquel no que se xera o dereito
- A Dirección Xeral de Mobilidade sinalou que ao longo do ano 2011, sumando tamén os meses de xaneiro e febreiro de 2012, un total de 2.448.995 usuarios empregaron a tarxeta de transporte metropolitano en Ferrol

Ferrol, 8 de marzo de 2012.- A Consellería de Medio Ambiente, Territorio e Infraestruturas sinala que a partir do vindeiro luns 12 de marzo xa se pode utilizar nos servizos de FEVE a nova tarxeta azul metropolitana, o que na práctica supón a integración plena do ferrocarril de vía estreita no Plan de Transporte Metropolitano de Ferrol. Así o anunciou hoxe o director xeral de Mobilidade, Miguel Rodríguez Bugarín, nunha rolda de prensa na cidade departamental. Neste acto tamén estiveron presentes a delegada da Xunta na Coruña, Belén do Campo; o alcalde de Ferrol, José Manuel Rey; representantes municipais dos demais concellos integrados na área de transporte metropolitano (Cabanas, Pontedeume, Fene, Narón, Neda, Valdoviño, Ares, Mugardos, Cedeira), así como o director xerente de viaxeiros de FEVE, Jesús San Miguel.

Os usuarios do ferrocarril poderán empregar a nova TMG azul para os seus desprazamentos, sen prexuízo de que, temporalmente, tamén poderán seguir empregando a antiga TMG laranxa.

As vantaxes da nova tarxeta son as que xa se están a producir nos autobuses metropolitanos: aforro de ata o 50% nos desprazamentos; non se paga máis por transbordar (tarifas planas en función do título de transporte empregado e do número de saltos da viaxe). No caso de realizar máis de 40 viaxes ao mes, o usuario percibirá o 15% do gastado nesa mensualidade a finais do mes seguinte a aquel no que se xera o dereito. A tarxeta pode empregarse en calquera das áreas de transporte metropolitano en vigor (Coruña, Santiago e, en breve prazo, Lugo), coas vantaxes asociadas, tanto no transporte urbano como metropolitano.

Os desprazamentos de FEVE contemplados no eido do Plan de Transporte Metropolitano de Galicia son:

A. Servizos con orixe en Ferrol

1.- Servizos días laborables

  • - Trece servizos Ferrol- Xuvia
  • - Tres servizos Ferrol- San Sadurniño
  • - Dous servizos Ferrol- Cerdido

2.- Servizos diarios (ademais dos anteriores)

  • - Dous servizos Ferrol- Xuvia (en sábados, domingos e festivos continúa a San Sadurniño)
  • - Tres servizos Ferrol- San Sadurniño
  • - Catro servizos Ferrol- Ortigueira

3.- Servizos sábados (ademais dos servizos diarios)

  • - Un servizo Ferrol- San Sadurniño

B. Servizos con destino Ferrol

1.- Servizos días laborables

  • - Trece servizos Xuvia- Ferrol
  • - Tres servizos San Sadurniño- Ferrol
  • - Dous servizos Cerdido- Ferrol

2.- Servizos diarios (ademais dos anteriores)

  • - Un servizo Xuvia- Ferrol (en sábados, domingos e festivos procede de San Sadurniño)
  • - Catro servizos San Sadurniño- Ferrol (procede en días laborables de Ortigueira)
  • - Catro servizos Ortigueira- Ferrol

3.- Servizos sábados (ademais dos servizos diarios)

  • - Un servizo San Sadurniño- Ferrol

Estas tarxetas poden solicitarse nas seguintes oficinas de NovaGalicia Banco.

Para transferir o saldo á nova tarxeta, o usuario debe levar as dúas tarxetas a un caixeiro de NovaGalicia Banco, introducir a antiga tarxeta, seguir as instrucións da pantalla, confirmar o traspaso do saldo á nova tarxeta. O caixeiro devolverá a tarxeta laranxa, introdúcese de novo a azul e a nova tarxeta queda actualizada.

Evolución viaxeiros

Ao longo do ano 2011, sumando tamén os meses de xaneiro e febreiro de 2012, un total de 2.448.995 usuarios empregaron a tarxeta de transporte metropolitano en Ferrol. No que se refire a recorrencia, un total de 4.056 tarxetas fixeron máis de 40 viaxes metropolitanas ao mes, polo que a Xunta abonou un importe de 25.202 euros en concepto de bonificacións.

Cómpre sinalar que o plan de transporte beneficia a 170.000 habitantes dos concellos de Ferrol, Ares, Cabanas, Cedeira, Fene, Mugardos, Narón, Neda, Pontedeume e Valdoviño.

Documento/s relacionados
Ligazon/s relacionadas